Top Header Ad

Banner 6

यू नेतौ खुण रुणु च उत्तराखण्ड

कन काल लगी यी नेता उत्तराखण्ड फर,
घचोलि घचोलि की कैरयाल उतणडण्ड,
कुई इनै बटि कुई उनै बटि घचोलणु च,
आज सैरु उत्तराखण्ड यू नेतौ खुण रुणु च।

कन राऊ लग्या यी नेता उत्तराखण्ड फर,
भैर करो देशी घ्यू अपणो थै खवाणा कल्चुण्ड,
कुई घ्वाड़ो थै त कुई मनिख़्यो थै थुरणु च,
आज सैरु उत्तराखण्ड यू नेतौ खुण रुणु च।

कन गुर्राऊ लगी यी नेता उत्तराखण्ड फर,
हुंकार फुंकार ई की कैरयाल चौखण्ड,
जै थै जनै सज आणि च उनै ई रगोड़णु च,
आज सैरु उत्तराखण्ड यू नेतौ खुण रुणु च।

कन हंत्या लगी यी नेता उत्तराखण्ड फर,
घर गौ की हालत कैरयाली उजाड़खण्ड,
जै जन सार आणि च उनी सरकुणु च,
आज सैरु उत्तराखण्ड यूं नेतौ खुण रुणु च।

कन ग्रहण लगी यी नेता उत्तराखण्ड फर
राजनीतिक माहौल घर-घर बणयु च भैर-भितरखण्ड
युंकी आग म गौ-गौ उत्तराखण्ड कु भलकुणु च
आज सैरु उत्तराखण्ड यूं नेतौ खुण रुणु च।

अनोप सिंह नेगी(खुदेड़)
9716959339

एक टिप्पणी भेजें

0 टिप्पणियाँ